Solu u Sole Sà

Sò solu, solu sò, sottu à i sulleoni,
À pinsà à 'ssu pattu chè t'ai rottu tù
Lampendu u mio core da pasce i lioni
È fendu cose strutte di tuttu ciò chì fù
Mi brusgianu a bocca i to basgi saliti
E to falze carezze, tutte e to bugie
Mi fermanu in gola i mio sogni feriti
Sò solu, solu sò à cuntà 'sse tuntie

Solu u sole sà, quantu sò solu avà

Sò solu, solu sò è solu vogliu stà
Vogliu lascià l'asciatu di e nostre sperenze
Cambiu d'ambiu, di mondu per un'antru campà
È campu senza tè, senza e to assenze
È mi ne vogu solu, solu quant'è u sole
Chì luce in lu celu d'una luce tremenda
È mi ne vogu solu, solu quant'è u sole
Circhendu in e mio notte una nova lucenda

Solu u sole sà, quantu sò solu avà
Solu u sole sà, quantu sò solu avà