In lu celu di li to ochji ci vecu un sole chì spampiglia
Un focu di mille culori è centu virani pumposi
Ci vecu nasce à ogni sguardu, un incantu, una maraviglia
È tanti agrotti per asconde l’ore di li ghjorni ritrosi
U to surisu hè dolce mele è li to basgi sò bumbò
Sì u rigalu di a vita, a prumessa d’un lindumane
È ti vuleria cantà e canzone quantu ne sò
Fà le corre in i to sogni cum’è l’acqua à e funtane
Purtà ti à vede e billezze di ‘ssu mondu chì s’apre à tè
Dà ti a sperenza per crede à un avvene sempre chjaru
Aiutà ti à cresce serena, à sceglie trà male è bè
Circà d’esse à u to latu è dì quantu ti tengu caru
Oghje sì ciuccia inturniata da l’affettu di tutti quanti
Aspittendu d’esse zitella, donna, sposa è poi mamma
Ma di quesse e stonde à vene fermanu à invintà i canti
È per avà u to surisu ci basta à sazià ogni brama
Aucun commentaire:
Enregistrer un commentaire