Passighjate
Vecu à nant’à l’acqua i riflessi d’altronde
I dissegni invintati da e fate marine
È a dolce carezza di l’ore matutine
M’invita à u viaghju per ‘sse stese prufonde
Fidà mi à u ventu
È lascià mi purtà
Vecu à l’infinita corre i raghji d’oru
Alliscendu u celu, basgendu a cunfina
È una voce linda, una voce turchina
Mi dice veni quì à coglie ‘ssu tisoru
Fidà mi à u ventu
È lascià mi purtà
Fidà mi à u ventu
È lascià mi purtà
S’è i sogni sò centu
Centu ne vogliu fà
Vecu à l’ore stillate celu è mare cunfusi
In un stranu cumbugliu u mondu sottu sopra
È in ogni artifiziu chì a natura adopra
Annicà si l’angosce è i sperà dilusi
Fidà mi à u ventu
È lascià mi purtà
Vecu à u fà di l’alba ‘sse fiure dissinsate
‘Ssi culori scimiti esse torna armunia
È fraià u mio sguardu d’un morsu di sulia
Rinnuvendu a chjama à tante passighjate…
Fidà mi à u ventu
È lascià mi purtà
Fidà mi à u ventu
È lascià mi purtà
S’è i sogni sò centu
Centu ne vogliu fà
Inscription à :
Publier les commentaires (Atom)
Aucun commentaire:
Enregistrer un commentaire