Chì mi bollenu in capu i sogni citatelle
Sintimi misteriosi chì u spiritu abbraccia
È chì scappanu, lestri, azzingati à e stelle
Tandu scrivu u sole chì empie a mio mente
A voce di l’inguernu chì strita frà e frasche
U zirlu cantarinu di a fresca surgente
È e bande spaperse, quassù in l’alti paschi
Quandi u dolce rispiru di zia puesia
M’ingutuppeghja l’esse d’un ansciu di serenu
Di e rime accuppiate ne scoppia a magia
Cum’è scritte in u celu, da un arcubalenu
Tandu scrivu a machja chì u focu affanna
L’andati scappatoghji, d’asgiu imbalsamati
A luna chì à i monti face a ninninanna
È i spichi ribelli, da l’acule accampati
Quandu l’estru impachjucu di l’ingegnu s’infiara
È summerge u mio sguardu di centu mila fiure
Marosulu di lacrime o ridente fiumara
Mi porti l’albe linde o e pessime bughjure
Tandu scrivu e piane vistute à a maghjinca
O e filicaghjole chì vaghjime arrussisce
L’alivi, l’albitrecce, e lecce, a tassinca
È l’onda saltarina chì corre per e spisce…
Aucun commentaire:
Enregistrer un commentaire