Sunnià

Dorme serenu è sunnià
D’esse u ventu eppò suffià
Empie e vele di i battelli
Scurtà u volu di l’acelli

Dorme serenu è sunnià
D’esse un stella è lucicà
Un lume dolce à l’infinita
In a bughjura esse a vita

Sunnià di tè
Quandi un surisu
Accende u to visu
À l’ore piacè

Dorme serenu è sunnià
D’esse l’altagna eppò vulà
Lascià mi andà, sopra i monti
In lu turchinu di l’orizonti

Dorme serenu è sunnià
D’esse un vascellu è sulchighjà
L’onda, e sciume di l’oceanu
Vucà intornu à u mondu sanu

Sunnià di tè
Quandi a to manu
Piglia a mio manu
Per l’ore piacè

Dorme serenu è sunnià
D’esse l’estate eppò scaldà
E stonde frete di i to ghjorni
Assulanà i to cuntorni

Dorme serenu è sunnià
D’esse cun tè è di sunnià
Ch’à l’ora mai, innamurati
Staremu inseme, abbracciacati

Sunnià di tè
Quandi u to sguardu
Scontra u mio sguardu
In l’ore piacè…