In Ogni Core

Bella sì cum’è u ghjornu
Quand’ellu hè prontu à sbuccià
È infiarà u cuntornu
Dolce sì cum’è u mele
Chì ne sà inzuccarà
E to lapre è a to pelle

Sì cum’è l’alba
Chì mi scalda
È m’imbriaca
Chì mi cunsola è pò guarisce ogni piaca
In u mio core

Feconde sò e to tarre
Stese immense à suminà
Da coglie e stonde care
Sicrete sò e to sponde
I to catagni à svilà
Tanti sogni sanu asconde

Sì cum’è l’oru
D’un tesoru
Chì spampiglia
È chì acceca à chì u vede, à chì u piglia
In u so core

È per tè ne vogliu scrive
Quant’elle sò dolce à vive
E mio stonde à u to fiancu
Scrive quantu sò fatate
E to ire, e to risate
È pò u to sguardu francu
À u mio core

Sì cum’un fiume
Mossu di sciume
È d’acque pure
Chì si ne fala è inveranisce l’ore sciagure
In ogni core