MA CHÌ CI SARÀ STATU ?

Ci campa in a mio mente un scornu di sulana
Mi ci vecu zitellu, spinseratu è felice
Abbramatu d’avvene è d’ore andarice
Sunniendu di beie l’acqua d’ogni funtana

S’appende à i mio ghjorni u ricordu fiuritu
D’un ortu paradisu duve ch’ellu era scrittu
Chì l’omu nasce scioltu è ne campa arrittu
Un mondu senza trave ne locu pruibitu

Ci dorme in u mio core un pezzu di terragnu
Cù e so onde chjare, u so limpidu celu
Mi ci vecu niscentre, mi ci vecu zitellu
Ma chì ci sarà statu ? Oghje ci sò orfagnu

Iè oghje in lu mio sonnu ghjacenu tante salme
Sò i mei è pò d’altri tocchi da ‘ssa disgrazia
‘Ssa scimità umana chì nisun’ guerra ùn sazia
È ùn aghju chè rime da appacià li l’alme…