U FANALE (Stéphane Ancey/ JY Acquaviva)

Surgente farè fiume prestu lampatu in mare
Cusì tuttu principia è giammai finisce
Di l'orizonti bughji ùn crede l'attrachjate
Chì ci saranu torna mille soli à sbuccisce...

Mille soli à scaldà è accende u mondu
È insignà a strada à a ghjente indecisa
Chì viaghja à pasponi vugulendu di tondu
Dendu li un sperà c’ùn cunnosce incisa

Calusgina d'amore quantu zingarè stelle
Da guidà quantu cori mez'à u timpurale ?
Ti dice 'ssa frizzura chì frisgia a to pelle :
« Stu sguardu vintannincu sarà u to fanale »

Fanale giuventù di maraviglie intinta
Tempi da vultulà si à dui nu l’arbiccia
Imbriacà si torna è po’ torna di vita
Cum’è un pampasgiolu natu mez’à finiccia

O a truita chì, ghjuntu u terzu ghjornu
Và à spusà l’eternu nu a so prima fonte
Fanale chì c’invita tutti à u ritornu
È puru chì fideghja dillandi l’orizonte

À vede s’è surgente si farà fiume è mare
Per innacquà dinù tante vite da fà
Tante stonde à scrive, e dolce cù l’amare
È tocc’è fila avanti, infinitu vugà

Aucun commentaire:

Enregistrer un commentaire