A to Vita

Ùn ci hè più bellu ghjornu c’à quellu chì si pesa
Quandu u marosulellu si chjina nantu a rena
Chì u sguardu si perde in a turchina stesa
Tandu, per una stonda, si strughje ogni pena

Ma tù ùn ci si più à vede ‘sse billezze
Batti d’altre cuntrate, d’altre machje serene
Forse u tempu sparghje e pessime tristezze
Ma u ricordu ferma è corre à l’avvene

Cum’hè chè tù ci lasci
Oghje chì tanti canti fermanu à cantà
Cum’hè chì a to vita ne ghjugne à l’annuttà

Ùn ci hè più bellu cantu c’à quellu c’ùn si sente
‘Sse note silenziose, quelle rime taciute
Sò forse sunniate ma sò cusì prisente
Quandu sbuccisce l’ora di e carezze mute

Ma tù ùn ci si più à risente ‘sse cose
Hai d’altre parolle per scrive e to ore
D’altre strade à sulana, di quelle c’ùn sò chjose
Da e sperenze rotte, cundannate à more

Cum’hè chè tù ci lasci
Oghje chì tanti canti fermanu à cantà
Cum’hè chì a to vita ne ghjugne à l’annuttà

Ùn ci hè più bella stonda c’à l’ombra d’una leccia
Vicinu à un ghjargalellu chì corre chjachjarendu
Senza nisun’pinseru ch’in a mente s’intreccia
Cù u calmu sulennu d’un riposu tremendu

Ma tù ùn ci si più à gode di quell’asgiu
U to riposu immensu u sparti cù l’acellu
E lapre di falcina t’anu datu un basgiu
Fatale era u toscu, t’hà apartu u celu

Cum’hè chè tù ci lasci
Oghje chì tanti canti fermanu à cantà
Cum’hè chì a to vita ne ghjugne à l’annuttà