Una Ferita

M’arricordu d’un locu profumatu
D’un mondu calmu di lume suminatu
D’un soffiu caldu, d’una voce dulcezza
Di l’ore sepiate, e stonde d’asgiatezza
È m’arricordu, m’era chjinatu
In l’arbicelle à u to latu
È l’ochji persi mezu à u celu
Eramu in ‘ssu pratu
Cum’hè quassù l’acellu
È ti vecu sbarsendu di vita
Mezu à a virdura di ‘ssa stesa fiurita
È i to capelli
À u ventu dati
È ‘ssi ghjorni belli
Sempre assuliati
M’arricordu d’una alba smisurata
D’un accunsentu, di tamanta abbracciata
Di u to surisu cum’é un sole novu
È di ‘ssu calore ch’ oghje ùn ritrovu
È m’arricordu t’avia basgiatu
À e to lapre m’era imprigiunatu
È u sguardu intintu di mille culori
Eramu in ‘ssu pratu
Cum’é sò i tisori
Ma oghje tù si smarita
È solu ferma una ferita
È u to ramentu
Datu à u ventu
È ‘ssi ghjorni beati
À celi nivulati…